بقلم: السمؤل جمال
يا جماعة الخير البرهان طلع لينا امس في مؤتمر الإدارة المدنية بعد ما مشى و اداء تحيات الولاء والطاعة لفرعون الاعلى ويبدو انه قد حسم له بعض نواقصه
فتلى على الناس خطاب لو شافوهو ود ضهري كان قال ليهو كلامك ده زي اللوري الطالع قُرقُر
الزول قال بالحرف الواحد مافي رجعة لمجد اللساتك!!!!
يعني لا مدنية لا حرية ولا سلام بس البنادق والكاكي والطق والبل والفجغ والمتك طيب يا ريس نحنا قلنا نرجع للبلد بالعقل إنتو دايرينها ترجع بالشنطة والسلاح؟ الغير دمر البلد وانهى شبابها ما زاد لكن نقص
ونحن روينا الثورة بدم خيره اهل السودان ما حنجدّعا ساي وزحمة اللساتك الامس وحتى الان مالية الدنيا دى اكبر استفتا حول ثورة الشعب المكتوب ليها الابدية
وبرضو قال كلام عجيب قال إنو هم كجيش قاعدين يوزعو الوزارات والمناصب زي الزلابية في حفلة ختان ياخي دي وزارة ما علبة كراميلا في عرس
وقال الوزراء بقو عاملين الوزارات زي رابطة أسرة وكل زول جايب ناسه وأخوه ونسابتو وحبوبتو مشكلة الحبوبات دائما فى لسان البرهان فى محل شتائم تحياتنا لى حبوباتنا واحدة واحدة
طيب إنتو ذاتكم منو البدا المحاصصات؟ ما إنتو الجبتو التوزيع دا وهى اكبر معضلات السودان انت منو وتعال ندوك شرعية انك انت زااااتك دائما فى محل ندوك دى واحدة من اكبر مشاكل دولتنا حيث انت الحاكم وهم الرعية وتوزع المناصب والحقب الوزارية حيثما وكيفما تشاء شرعية تدى الاخرين وانت المالك دى يجب ان تفهم انها زالت وللابد
فلو كانت مشكله الوزراء انهم بيبددو المال العام عليك بمحاسبة من كانو داخل القيادة العامة وخرجو بترليونات من المال العام و كيلوهات الذهب التى لا حصر لها يشترون بها افخم المنازل والسيارات فى مناطق السودان التى لم تتطالها الحرب
والهامش رغم فلقنتو يا دوبو طالع في الترمس!
غطسنا سنين في بحر الحرب ولسه البرهان شايف المشكلة في اللستك؟
اللستك على الأقل بنبدلو لكن البنادق لمن تطق ما في زول بيبدل الجرح!
نحنا ما عايزين وزارة تبقى نادي لا عايزين حكم فيهو أنا ربكم الأعلى او انا رب الفور نحنا دايرين بلد زي خلق الله الشارع فيها يودي والمواطن يلقى حقو والهامش ما يبقى تمومة جرتق وترميز تضليلى متهض رغم الانتماء المصلحى الزائف
وختاماً نقول ليك
انت اكذب من عرقوب فى مواجه ثورة ديسمبر
البندقية بتكسر لكن ما بتبني بيت
والجيش حارس ما حاكم
والزول البيوزّع المنصب لأهلو بيقعد في آخر الصف
سنقوم لثورتنا قريبا وستـٌـٌٌـكُـُنس كما شوارع الوطن التى تعج بفارغ الزخيرة وركام البنية التحتية وعظام من ماتو بفعل حربكم اللعين
حرية سلام وعدالة
مدنية خيار الشعب
